泳儿出席活动唔惊再遭网民批衣着求其 ：从来都唔会hea住做 泳儿早前出席音乐节目，以银色tube top加阔身牛仔裤示人，就被网民留言狠批衣着打扮无taste：「身为一个出道18年嘅实力女歌手，着到出show系咪求其得济？都40岁，系咪可以有taste 多啲？着到去兰（兰桂坊）咁」。 今日（30/9）泳儿现身黄竹坑出席海洋公园《哈罗喂·全园祭之厉鬼围城》新闻发布会。被问到今日一身打扮，会否担心再遭网民批评？泳衣接受访问时大方表示：「咁又唔惊，因为我哋嘅团队从来都唔会hea住做，无论出席任何嘅场合，大家都好花心思、同埋好用心去做，咁所以我就唔会担心佢哋会讲，因为我会出嚟澄清返。（衣着造型自己决定，还是公司？）其实两方面都有嘅，团队会俾啲衫我拣，试完之後，就会睇吓边件啱，大家系有沟通。（有冇觉得网民乜都话一餐？）咁又冇嘅，因为做得艺人系要面对不同声音，咁所以心态系好紧要。而我就冇嬲嘅，不过我就想维护返我嘅团队，品牌同我自己，其实每样嘢我哋都唔系求其去做。我指系想解释返俾佢哋听。」