佘詩曼首戰律政劇　孖高海寧做鐵人姊妹

無綫早前指會開拍律政題材女主劇《正義女神Themis》，據知阿佘看過劇本後相當喜歡，已秘密接拍，現時除了挑燈夜讀劇本外，更積極做運動備戰，務求以最佳狀態上陣；節目巡禮當日還公布了其他演員名單，包括多年沒拍無綫劇的譚耀文、許紹雄、周嘉洛、陳煒與戴祖儀等。

至於另一「鐵人」高海寧（高Ling）跟阿佘一樣，之後會拍攝《新聞2》及電影版，除了剛跟馬國明完成賀歲片《麻雀女王追男仔》外，日前她在日本大阪孖組合農夫拍攝旅遊節目，前日隨即又趕到珠海出席晚宴，一身Deep V長裙獻唱，又與觀眾握手，場面熱鬧！她甫返酒店即Po相分享，攰爆寫道：「鐵人Ling唔易做。」

昨日她已於深圳孖馬國明、陳曉華等為新劇《夫妻的博弈》作首日拍攝，日前她接受東網獨家訪問時說：「今次又係同馬國明合作，同張頴康就演夫妻，呢套係輕喜劇，之後成年都對住馬國明，好開心，因為同佢演戲好放鬆。」據知此劇故事貼地，但亦帶點復仇情節，她說：「可以帶出獨立女性思想，我好鍾意。忙咗成年，雖然成日飛，但好耐冇去旅行，之前去大阪拍嘢就當放假，返嚟就開劇，重新投入工作，好耐冇拍劇，都有啲戲癮。」問到體力能否支持，她大派定心丸叫大家不用擔心，會爭取時間休息。

今年同樣忙爆、有最多劇在手的無綫藝人陳曉華亦有份拍《夫》劇，她受訪時說：「前幾日造型嘅時候，大家都覺得同平時嘅陳曉華好唔同，造型已經畀咗好大改變我，有啲突破點，所以好期待，因為平時都係演柔弱角色，但今次比較強悍。」

馬國明則笑言最近經常黐住高Ling：「之前同佢少合作，對上一次係《C9特工》做夫妻，今次角色係高Ling嘅好友，陪佢共患難。（不停忙，阻住造人大計？）一向都隨遇而安，順其自然，有工開梗係做嘢先。」而首度與高Ling合作的張頴康，劇中與高Ling有感情轇轕，問有否「愛情動作戲」？他笑說：「暫時未見有，最好唔好搞我啦！如果有呢啲場面，我又唔可以食嘢，畀我食吓嘢啦！」問到身為「人夫」的他，與太太麥雅緻有否「博弈」？他笑說：「點解咁期待呢套劇，就係因為同老婆冇博弈，因為老婆永遠都係啱！」