張明偉早前宣布與李麗珍女兒許倚榕拍拖，今日（16日）他以樂隊Charming Way身份出席《新城勁爆頒獎禮2024》記者會，他接受訪問時透露Charming Way將以推出專輯為目標，問到會否再搵女友做MV女主角或合唱，他即謂：「你哋問返佢啦，我唔會情緒勒索去迫佢。（友情價？）利是都有一封嘅。（慰勞佢？）我會盡力去慰勞佢，哈！give and take咁啦。」

問到公開戀情後會否有壓力，張明偉指沒有刻意隱瞞或公開，一切順其自然，但亦感謝大家祝福：「我係認識佢媽媽先嘅，不嬲都覺得媽媽好正，有機會認識佢個女，發覺仲正，所以相處好愉快。（你追許倚榕前有無同珍姐講？）我個人比較認真，唔敢話追，但都有請示咗先，佢又無叫我放馬去嘅，佢生個咁好嘅女已經係最大嘅幫助。」