星8卦丨「癡情」媾女上癮阿媽出招揀 識做新抱一家和睦

「癡情」確實太過多情，想媾邊件靚女都冇難度，連佢嗰位思想開放嘅媽媽，都頂唔順開聲話應該要停落嚟，搵返個正經人家啦！問題係「癡情」對每一個都係認真嘅，除咗嗰次鍾意錯「飛女」畀人笑到面黃。

「飛女」平時唔出聲，亦係姊妹群中最女仔，最討喜，但佢自細就唔鍾意男仔，全世界都知，係「癡情」完全唔知情。「癡情」又衰嘅，恃住自己紅就瘋狂力追，唔識出去收下風對方係乜料，講真你咁紅「飛女」梗係唔會得罪你，仲借啲意利用佢嘅知名度幫自己再上一層樓。

經過呢次打擊之後，「癡情」都冇話收斂下，反而換畫換得更多更密。總之高瘦留長髮嘅都係佢力追嘅對象，又唔知點解喺夜店識到「大眼」，兩個人一撻即着，最勁係「大眼」同開放阿媽好啱傾，冧到阿媽當佢係女咁親近，於是「癡情」樂於有人照顧長輩，自己繼續喺出面鬼混。

最後令「癡情」停落嚟係因為阿媽出招，逼佢同「大眼」結婚，仲出到經濟封鎖嚟嚇「癡情」乖乖娶老婆，結果阿媽娶到心抱又湊到孫。「癡情」近年表面真係好生性，不過久唔久 會出去搵啲無知名度嘅妹妹仔開心下，「大眼」志在泊到好碼頭，仲幫手做埋戲，明白聰明女人要隻眼開隻眼閉，識路返屋企咪得囉！