高海宁回应今年贺岁片质素比较差：唔会因为一个人言论影响 | 香港01
昨日（9日）TVB举行“TVB赛马日”，旗下一班艺员盛装出席，胡枫更化身财神现身马场，成功吸睛。姚焯菲、锺柔美及林智乐打头阵于沙圈劲歌热舞，而《亚洲超星团》（丁子朗、冼靖峰、黄奕斌、黄星绰、文佐匡）亦在马场表演，成功吸引到不少TVB粉丝到场支持。
马国明及高海宁接受传媒访问时表示最近都“孖公仔”般出场，马国明就笑指“要黐住女王”：“呢两年黎都係黐住女王，黎紧呢一年都係黐住女王，偷女王啲光芒。”而高海宁则表示未来一年都会一齐合作，马国明指：“因为嚟紧开《新闻女王2》啦，跟住嚟紧应该係开《飞常日志2》都要开，所以嚟紧都係黐阿女王。”
至于二人在剧中的对手戏方面，马国明与高海宁都异口同声表示不知道：“剧本嘅嘢真係未收到，但係知道有份囉，继续有份。”而一直盛传2月将开镜，他们则表示应该是3月：“听闻啦，未确定。”
而二人一同合作的贺岁电影，日前就一起去谢票，马国明指自己是第一次谢票：“因为香港係第一次拍电影，所以我係第一次喺香港谢票，都未试过咁样，但我觉得几开心。”高海宁则表示自己不是第一谢票，但今次谢票比之前更开心：“我都试过谢票嘅之前，但係今次谢票特别开心啦，因为始终係重要角色，咁再加上大家嘅反应好热情，咁自己就会觉得宁舍开心。同埋喺我哋入场之前，会喺门口度听到大家啲笑声，咁呢个嘢係最开心嘅。”
高海宁指今次与马国明及导演一起去谢票：“我哋会多咗时间，可能同啲fans一齐影下相啊，同佢哋倾下计啊，问下问题啊。”马国明感觉尾场时粉丝特别兴奋：“尾场我哋係可以用多啲时间，同啲观众去影下相，因为之前嗰啲因为你赶著下一场就唔可以留低，所以啲观众醒目啊，最好买尾场就最醒目啊。”
虽然粉丝在他们谢票时，很想“留住”他们，但因为要赶下一场，所以他们只好打个招呼再大合照就继续赶场：“所以头几场嗰啲就可能淨係say个Hello，影咗大合照咁样，但係临last嗰一场就可以多啲时间影下相。”
最近网上有人评论今年贺岁片质素比较差，高海宁就觉得每个人都有自己的评价：“咁我唔会因为一个人嘅一个言论，而影响咗成个大嘅市场，再加上其实特别係成个市场，可能未必咁好情况下，我觉得反而应该多啲嘅鼓励。譬如我会自己畀钱去睇晒咁多不同嘅贺岁片，因为呢啲係出于一份支持，再加上其实我哋而家可以做嘅就係，我哋希望带多啲嘅欢乐畀观众，咁呢啲时候其实我觉得睇你用咩角度去评价呢一件事。即係如果你想睇一啲得奖片段嘅，你咪去睇文艺片囉，就唔係贺岁片。”
马国明都觉得大家标准都不同：“可能佢嘅标准係要睇攞奖戏嘅，咁其实我成日觉得贺岁片係带欢乐畀观众嘅，又唔使拍到咁深，最紧要大家开心心咁咪得囉。所以当然每个人有自己嘅言论自由，咁大家标准亦都唔同，所以我係会听到佢嘅説话声音。但係我都係嗰句，每个人嘅标准唔同嘅，所以又唔可以话一个人代表晒全香港。”
